home button
courses Ty Newydd

Mae'r cyrsiau yn cynnig y cyfle i weithio mewn modd agos ond anffurfiol gydag awduron proffesiynol. Fel arfer bydd y cyrsiau trwy gyfrwng y Saesneg yn rhedeg o nos Lun hyd fore Sadwrn a'r cyrsiau trwy gyfrwng y Gymraeg yn cychwyn am 6.00 ar nos Wener ac yn gorffen ar ôl cinio brynhawn Sul. Mae'r cyrsiau'n agored i bawb dros 16 oed, ac nid oes angen unrhyw gymwysterau i'w mynychu. Ni cheir mwy nag 16 aelod ar unrhyw gwrs.

Rheolir Ty Newydd gan Ymddirieolaeth Taliesin a chyda chymorth Cyngor Celfyddydau Cymru.

Ty Newydd Llanystumdwy Cricieth Gwynedd LL52 0LW
Ffôn 01766 522811 Ffacs 01766 523095
e-bost: tynewydd@dial.pipex.com

Mae llyfryn ar gael sy'n cynnwys manylion llawn am y cyrsiau.

/font>Cwrs penwythnos llawn o hwyl i ddysgwyr profiadol (wedi cael dros dair blynedd o wersi). Cewch gyfle i fagu hyder a gloywi eich Cymraeg llafar drwy sgriptio a pherfformio sefyllfaoedd dramatig byr. Gwaith grwp ar y cyfan, felly dewch â ffrind efo chi!

NESTA WYN JONES Bu'n gweithio yn Adran Olygyddol Cyngor Llyfrau Cymru ond erbyn hyn mae'n ffermio yn Abergeirw. Enillodd ddwy wobr am ei chyfrolau a dwy ysgoloriaeth deithio gan Gyngor Celfyddydau Cymru. Cyfieithwyd ei barddoniaeth i nifer o ieithoedd.

CYRIL JONES Yn byw yn y Drenewydd ac yn diwtor hanner amser gyda Chymdeithas Addysg y Gweithwyr. Y mae erbyn hyn yn treulio'r gweddill o'i amser yn ysgrifennu. Cyn-olygydd Y Blewyn Glas, ac enillodd y Goron ym Mhrifwyl Aberystwyth 1992.



Mawrth 30-Ebrill 1

3. CWRS Y CAMPWYR!
CWRS ENILLWYR EISTEDDFODAU
Cwrs yn agored i'r rhai sydd wedi dod i'r brig mewn eisteddfodau ysgol a lleol yn unig!

Mae'r cwrs newydd yma ar gyfer pobol ifanc sy'n amlwg yn ymddiddori mewn sgrifennu a chyfansoddi, ac sydd wedi dod i'r brig yn eu maes wrth farddoni neu wrth ysgrifennu rhyddiaith. Mae'n gwrs ymarferol sy'n addas iawn ar gyfer Ty Newydd, gyda'r cyfle i dynnu ar waith maes, gwaith llafar a gwaith ysgrifenedig fel sail i'r cynnyrch. Cawn ymarferion, darlleniadau a gwaith grwp.
Er gwaethaf y cythraul cyfansoddi, mae pob sgwennwr yn mwynhau cwmni sgwennwyr eraill. Dyna sut mae rhywun yn cymharu syniadau, yn cael gwybod am ddylanwadau a ffasiynau newydd, yn cael cyfle i gael barn gan bobol o'r un anian. Anogir pawb sy'n ymuno â'r cwrs i ddod ag o leiaf un enghraifft o'i waith gorffenedig (stori neu gerdd) ynghyd ag un egin-syniad.
Mae Mihangel Morgan ac Iwan Llwyd yn enwau cyfarwydd ym maes rhyddiaith a barddoniaeth, a bydd y ddau yn ceisio cynorthwyo pawb sydd ar y cwrs i gael y gorau o'r lle a'r cwmni. Mae cwrs o'r fath yn ehangu meddyliau a phrofiadau, ac yn rhoi digon o destun straeon a cherddi i'r tiwtoriaid hefyd.

IWAN LLWYD Enillodd Goron Eisteddfod Cwm Rhymni am ei gerddi ar y testun Gwreichion. Mae wedi cyhoeddi nifer o gyfrolau o farddoniaeth, ac yn ddiweddar wedi addasu llyfrau ar gyfer plant. Cyfrannwr i gyhoeddiadau megis Taliesin a Barn. Enillodd wobr Llyfr y Flwyddyn ym 1998 a bu'n teithio De' r Amerig yn ddiweddar yng nghwmni Twm Morys.

MIHANGEL MORGAN Mae'n byw yn Nhal-y-bont, Ceredigion ac yn darlithio yn Adran Gymraeg, Prifysgol Cymru Aberystwyth. Mae wedi cyhoeddi dwy gyfrol o gerddi, tair nofel a dro hanner cant o storïau byrion. Ar hyn o bryd mae ganddo nofel arall a chyfrol o gerddi i blant yn y wasg.



Mehefin 1-3

4. CERDDED A CHERDDI
Cyfle unigryw i blethu cerdded ag ysgrifennu, i dreulio penwythnos yn edrych ar ein hamgylchfyd unigryw yma yn Llanystumdwy a'r ardal. Defnyddir cyfarpar a chasgliadau o samplau i syllu, rhyfeddu a meddylu arnynt i ysbarduno cerddi. Ceir amser i sgwrsio ystelcian a sgriblo gyda dau o ffugurau blaenllaw naturiaeth a barddoniaeth Cymru. Ysgogiadau i sgwennu o wahanol gynefinoedd ac amser i ailwampio a thacluso. Cwrs i bawb boed yn gerddwr, yn fardd, yn naturiaethwr neu'r rhai sydd am ddechrau dysgu am ein hamgylchfyd rhyfeddol.

YR ATHRO GWYN THOMAS Magwyd Gwyn Thomas ym Mlaenau Ffestiniog, ac addysgwyd ef ym Mhrifysgol Cymru Bangor, a Choleg Iesu. Rhydychen. Treuliodd ei yrfa yn Adran y Gymraeg, Prifysgol Cymru, Bangor. Ymddeolodd o Gadair yr Adran yn niwedd Medi 2000. Y mae'n fardd, beirniad, ysgolhaig, a chyfieithydd. Y mae hefyd wedi ysgrifennu llawer iawn ar gyfer teledu a radio. Cyhoeddwyd casgliad sylweddol o'i gerddi dan y teitl Gweddnewidio gan Wasg Gee yn 2000. Yn 2001 cyhoeddir ei gyfieithiad Saesneg o holl gerddi Dafydd ap Gwilym gan Wasg Prifysgol Cymru.

NORMAN CLOSS PARRY Athro / Pennaeth ysgol wrth ei alwedigaeth. Bardd, ysgrifwr,
naturiolaethwr a physgotwr wrth reddf. Awdur pum cyfrol i ysgolion natur/ cefn gwlad, ac un gyfrol o gerddi- 'Y wefr o weld'. Mae'n feirniad yn adrannau barddoniaeth / llenyddiaeth a gwyddoniaeth yn Eisteddfod Genedlaethol yr Urdd a'r Eisteddfod Genedlaethol. Mae'n darlledu yn gyson ar elfennau o'i ddiddordebau.



Mehefin 30

5. Cwrs Undydd Barddoniaeth Dic Jones
Cwrs undydd yn canolbwyntio ar y gwneud yn hytrach nag ar y dadansoddi. Bydd y pwyslais llai ar theori a thrafod themâu a mwy ar gynllunio cerddi a pherfformio.

DIC JONES Ffermwr a phrifardd. Ymhlith ei gyhoeddiadau mae Os Hoffech Wybod, Caneuon Cynhaeaf, Storom Awst, Sgubo'r Storws ac Agor Grwn. Cyhoeddodd hefyd dair cyfrol ar y cyd a Roy Davies. Y mae'n darlledu'n gyson ac ef yw cadeirydd y gyfres radio boblogaidd Talwrn y Beirdd. Mae hefyd yn ysgrifennu colofn wythnosol yn Golwg.



Awst 18

6. Cwrs Undydd Barddoniaeth Nesta Wyn Jones
Llygaid i weld/ Clust i glywed
Cwrs byr i'r rhai sydd yn dechrau ysgrifennu barddoniaeth yng nghwmni bardd profiadol. Canolbwyntir ar y pum synnwyr fel man cychwyn gan ddewis gwahanol fesuriadau. Trist neu hapus- chi sydd i ddewis!

NESTA WYN JONES Bu'n gweithio yn Adran Olygyddol Cyngor Llyfrau Cymru ond erbyn hyn mae'n ffermio yn Abergeirw. Enillodd ddwy wobr am ei chyfrolau a dwy ysgoloriaeth deithio gan Gyngor Celfyddydau Cymru. Cyfieithwyd ei barddoniaeth i nifer o ieithoedd. Hi hefyd yw Cadeirydd yr Academi Gymreig.



8 Medi

7. Cwrs Undydd Barddoniaeth Ifor ap Glyn
Deuparth gwaith yw dechrau, hefo sgwennu cerddi fel popeth arall. Ti'n meddwl trio yn yr Urdd, neu'n gorfod gwneud rhywbeth ar gyfer dy bortffolio Lefel 'A', neu falle jest isio bwrw bol ar bapur; ti wedi "rhyw gychwyn sgriblo" ond ti ddim yn sïwr be i wneud nesa. Dyma gwrs undydd fydd yn ceisio rhoi hyder i ti fynd gam ymhellach. Cyfle i sgwennu rhywbeth newydd, neu ddatblygu rhywbeth 'ti wedi ei ddechrau'n barod.

IFOR AP GLYN Yn byw yng Nghaernarfon. Enillodd Goron Eisteddfod Genedlaethol Môn yn 1999 ac mae o wedi bod yn perfformio'i waith yn gyhoeddus ers pymtheg mlynedd. Mae'n cyfaddef fod o'n llawer gwell am ddechrau cerddi nag am eu gorffen!



Hydref 12-14

8. YSGRIFENNU CREADIGOL
Cwrs ar gyfer unrhyw un sydd ag awydd sgwennu unrhyw fath o ryddiaith, neu angen sbardun neu broc i'r dychymyg. Penwythnos o ysbrydoliaeth, hwyl a chwmni difyr, a does dim angen paratoi gwaith ymlaen llaw.

BETHAN GWANAS Wedi sgwennu ychydig o bopeth: tair nofel; Amdani! (oedolion) Bywyd Blodwen Jones (dysgwyr) a Llinyn Trôns (arddegau); dyddiadur : Dyddiadur Gbara; straeon byrion, erthyglau, monoglau radio; colofnau a thair cyfres deledu wedi'u selio ar Amdani! Mae ganddi hefyd brofiad helaeth o diwtora plant ac oedolion, a chwrs yn Nhy^ Newydd a'i hysbardunodd i ddechrau sgwennu o ddifrif!

WILLIAM OWEN ROBERTS Addysgwyd yng Ngholeg Prifysgol Cymru, Aberystwyth, Ymysg ei waith gwreiddiol ar gyfer y teledu mae Teulu'r Mans (ar y cyd a John Pierce Jones), Pris y Farchnad, Y Parc. Ef yw awdur llyfrau megis Bingo!, Y Pla (1987) a Hunangofiant (1990). Mae ei nofel newydd Paradwys allan Nadolig 2001.

Bydd yna ddarllenwr gwadd ar y cwrs hwn



Hydref 26-28

9. CWRS RHYDDIAITH
Dylan Thomas yn Nadolig Plentyn yng Nghymru wnaeth geisio cofio a wnaeth hi fwrw eira am chwe diwrnod a chwe noson pan oedd e'n ddeuddeg ynteu am ddeuddeg diwrnod a deuddeg nos pan oedd e'n chwech. Hawdd cydymdeimlo â'i ddilema. Ar y côf mae'r bai, wrth gwrs, ac ar y nos, gan mai gyda'r nos y byddai'n cofio gan amlaf . Ac mae'r nos , fel y dywedodd y Dylan arall hwnnw, Bob, yn chwarae triciau â ni. Onid dychymyg, wrth edrych yn ôl, yw llawer o'n bywyd ni? Onid yw'r ffeithiol a'r dychmygol yn gyflenwol, y naill i'r llall? Ac i ddefnyddio'r hen wireb newyddiadurol honno, a ddylid gadael i ffeithiau ddifetha stori dda? Ai nofel, ai hunangofiant yw Un Nos Ola Leuad? Oes ots? Mae gen bob un ei stori; am wn i, mai ei stori ydy hanfod pob un. Rhannu'ch stori, rywsut, rywfodd, ydy camp sgwennu. Mi fedrwn ni helpu chi efo'r dawn dweud, ond mae'r deunydd crai ynoch chi'n barod. Ac fel y dywedodd T.H.Parry-Williams, wrth ichi drafod geiriau, mi gewch chi gip ar eich anian chi eich hun!
Mae'r cwestiynau hyn, o leiaf, yn codi trafodaeth. Felly, fe gawn ni drafod. Mae'r cwrs yma'n addas ar gyfer dechreuwyr ac arbenigwyr, dewch i drafod ac ysgrifennu!

HARRI PRITCHARD JONES Awdur 14 o gyfrolau, yn nofelau a straeon byrion yn bennaf. Dyfarnwyd gwobrau i'w waith gan Kate Roberts a John Gwilym Jones, ac enillodd Wobr Cyngor y Celfyddydau am ei nofel Dychwelyd. Mae wedi cyhoeddi llu o erthyglau ar amrywiol bynciau, ac wedi cyhoeddi nifer o sgriptiau teledu- yn eu plith addasiad o Brâd Saunders Lewis, ffilm deledu ('Sglyfaeth) a sgriptiau ar gyfer cyfresi wedi'u hanimeiddio, yn cynnwys Chwedlau Caer?gaint a Gw^r y Gwyrthiau. Cyfieithwyd ei waith i 6 o ieithoedd.

LYN EBENESER Ganwyd a magwyd Lyn Ebeneser gerllaw Ystrad Fflur. Yn dilyn cyfnod byr yn y Brifysgol yn Aberystwyth, a chyfnod hirach yn gweithio fel cynorthwy-ydd llyfrgell yno, trodd i fyd newyddiaduraeth gyda'r Cambrian News i gychwyn ac yna gyda'r Cymro am 17 mlynedd. Bu'n cyflwyno cyfresi teledu fel Pwy Sy'n Perthyn? a Hel Straeon ac ar hyn o bryd mae'n cyd-gyflwyno P'nawn Da ar S4C Digidol. Mae'n awdur nifer o gyfrolau gan gynnwys Crwydro Celtaidd, a nofel Noson yr Heliwr wedi ei seilio ar sgript ffilm o'r un enw. Cyhoeddodd ei hunangofiant, Cae Marged. Adlewyrchodd ei ddiddordeb mawr mewn llenyddiaeth arswyd gan Merch Fach Ddrwg a'r llynedd cyhoeddwyd ei nofel, Dim Heddwch. Bu'n gyfrifol hefyd am gyfrolau amrywiol fel I Adrodd yr Hanes, Twyll Dyn, Pobol y Cwm a Fi, Dai sy' 'ma, un o'r cyfrolau a werthodd fwyaf yn yr iaith Gymraeg.



Tachwedd 9-11

10. ALLAN O'R DRÔR
Mae gan bawb gerdd, stori fer, ysgrif neu hyd yn oed nofel yn cuddio yn rhywle, naill ai yn y dychymyg neu mewn drôr. Ond mae hi'n anodd gwybod beth i'w wneud â hi, sut i ddechrau gweithio arni, sut y mae mynd ati i'w chaboli. Beth am chwilota amdani a'i dangos hi i rywun sy'n barod i'w thrafod hi mewn modd personol ac adeiladol? Cwrs ar gyfer unrhyw un sydd ag awydd sgwennu.

MANON RHYS Awdur a sgriptwraig . Cyhoeddodd ddwy nofel - Cysgodion a Tridiau ac Angladd Cocrotshen, a Cwtsho, sef casgliad o straeon byrion. Mae hi'n ysgrifennu'n gyson ar gyfer y teledu, gan gynnwys Pobol y Cwm. Pontiodd y ddau gyfrwng, y geiriol a'r gweledol, drwy addasu ei chyfres deledu Y Palmant Aur yn dair nofel.

EIGRA LEWIS ROBERTS Ganwyd ym Mlaenau Ffestiniog ac addysgwyd yng Ngholeg y Brifysgol, Bangor. Awdur llu o nofelau yn cynnwys Mis o Fehefin, Ha' Bach a chyfrolau amrywiol yn cynnwys Siwgr a Sbeis, Plentyn yr Haul, Seren Wib, Llygad am lygad a chyfieithiad o ddyddiadur Anne Frank. Mae wedi ysgrifennu'n helaeth ar gyfer y radio a'r teledu yn cynnwys pum cyfres o Minafon, addasiad o dair stori o'i chyfrol Llygad am Lygad, Pobol y Cwm, addasiadau o nofelau Elena Puw Morgan, Y Wisg Sidan ac Y Graith a chyfres ddrama radio ar Streic Fawr y Penrhyn yn ystod Hydref a Thachwedd 2000. Yn 1998 derbyniodd radd MA gan Brifysgol Cymru.



Tachwedd 23-25

11.YSGRIFENNU AR GYFER PLANT A'R ARDDEGAU
Bydd yr awduron yn datgelu cyfrinachau cynllunio, ymchwilio a chymeriadu ynghyd â nifer o elfennau hanfodol ysgrifennu i bobl ifanc. Byddwn yn edrych ar waith ymchwil , deialog a'r naratif holl bwysig. Ar ôl brasgynllunio bydd pob mynychwr yn gweithio tuag at ei darged ei hun, cyfle felly i gael trafodaeth berthnasol a phersonol. Ceir sylwadau a chymorth gan y ddau awdur fydd yn parhau hyd yn oed tu hwnt i'r penwythnos.

MAIR WYNN HUGHES Llenor, cyn-athrawes a ffarmwraig sydd wrth ei bodd ymysg ei chasgliad sylweddol o lyfrau yw Mair Wynn Hughes. Awdur dros 40 o lyfrau i blant a'r arddegau. Crëwr Wali Wmff a nifer o gymeriadau cofiadwy eraill. Yn storïau rhamant, antur neu drafferthion tyfu i fyny mae Mair Wynn Hughes yn feistres ar ei maes. Enillydd Gwobr Tir na N'og deirgwaith , y tro olaf yn 1996 am Coch yw lliw Hunllef , ceir ychydig o awduron mor brofiadol â chymwys i gymryd y cwrs hyn.

J SELWYN LLOYD Athro wedi ymddeol. Awdur 29 o nofelau antur ynghyd â rhai cannoedd o straeon i gylchgronau. Wedi bwrw ei brentisiaeth yn sgwennu storïau antur yn Saesneg i gomics fel WIZARD a HOTSPUR. Mae wedi cyfrannu i'r Radio a Theledu. Enillydd Gwobr Tir Na N'og ddwywaith - ym 1977 am Trysor Bryniau Caspar ac ym 1983 am Croes Bren Yn Norwy. Yn Hydref 2000 dyfarnwyd Tlws Mary Vaughan Jones iddo am ei gyfraniad i lenyddiaeth plant dros gyfnod o flynyddoedd.